"იუვე" იგუაინს მაინც გაყიდის?
როგორც ჩანს, „ტოტენჰემთან“ გატანილმა გოლმა არაფერი შეცვალა და ტურინის „იუვენტუსი“ გონსალო იგუაინს მაინც გაყიდის.
Gazzetta dello Sport-ის თქმით, „ბიანკონერის“ ხელმძღვანელობა ზუსტად იგივე პოზიციაზეა, რაზეც გუშინდელ მატჩამდე, შესაბამისად, არგენტინელის „რომაში“ გადასვლა კვლავ აქტიურად განიხილება.
თავის მხრივ, „ჯალოროსი“ ედინ ჯეკოს „ინტერში“ ტრანსფერის დასრულებას ელოდება, რომელიც, თუკი იმავე Gazzetta dello Sport-ს დავუჯერებთ, კვირის ბოლომდე გამოცხადდება. გარიგების ღირებულებად 15 მილიონი ევრო სახელდება.
როგორც ცნობილია, თავად იგუაინს „იუვეს“ დატოვება არ სურს, თუმცა „რომა“ მას კაპიტნის სამკლაურს სთავაზობს და „ბებერ ქალბატონთან“ ტრანსფერის დეტალებიც შეთანხმებული აქვს.
