ყველა დროის რეკორდი - ჯოკოვიჩმა მასტერსებით ნადალს გადაასწრო
ნოვაკ ჯოკოვიჩმა მოგებული მასტერსების რაოდებობით რაფაელ ნადალს გადაასწრო და ყველა დროის რეკორდსმენთა სიაში ერთპიროვნული ლიდერია.
სერბმა ვარსკვლავმა რომის მასტერსის ფინალურ შეხვედრაში არგენტინელ დიეგო შვარცმანს 7:5; 6:3 მოუგო. შვარცმანმა ტურნირიდან სწორედ ნადალი გამოთიშა და ფინალიც კარგად დაიწყო, მაგრამ პირველ სეტში ორბრეიკიანი უპირატესობა ვერ შეინარჩუნა.
High Five ✋@DjokerNole clinches his fifth title in Rome ????
— ATP Tour (@atptour) September 21, 2020
????: @TennisTV | #IBI20pic.twitter.com/6aIUOszsQE
შედეგად, ჯოკოვიჩმა კონკრეტულად რომის ტურნირი მეხუთედ მოიგო, მასტერსის სერიის ტიტული კი 36-ედ მოიპოვა და, როგორც ვთქვით, ამ მხრივ ყველა დროის საუკეთესო შედეგი აქვს. ნადალი მას 1 ტიტულით ჩამორჩება, როჯერ ფედერერის აქტივში კი ამავე რანგის 28 ჩემპიონობაა.
„ნოლესთვის“ რომი ერთ-ერთი საყვარელი ტურნირია, მან ასევე ხუთჯერ ინდიან უელსსა და პარიზშიც გაიმარჯვა, 6-ჯერ კი ტიტული მაიამიში დაისაკუთრა.
კიდევ ერთი მნიშვნელოვანი ფაქტი - მსოფლიო რეიტინგის ლიდერის რანგში, ჯოკოვიჩისთვის მიმდინარე კვირა 287-ეა, რითაც მან პიტ სამპრასს გადაასწრო და მეორე ადგილზე გადაინაცვლა. ყველა დროის რეკორდსმენმა ფედერერმა ATP-ის რეიტინგს ჯამურად 310 კვირის განმავლობაში ულიდერა.
საჩოგბურთო სამყარო, მათ შორის ნოვაკიც, „როლან გაროსისთვის“ ემზადება. პარიზის კორტებზე ტურნირის ძირითადი ბადის მატჩები 27 სექტემბრიდან დაიწყება.