გორგოძე მონტევიდეოს ტურნირზე ერთეულებში ნახევარფინალში, წყვილებში კი ფინალშია

ქართველი ჩოგბურთელი ეკატერინე გორგოძე ურუგვაის დედაქალაქ მონტევიდეოში მიმდინარე WTA-ს ტურნირზე წარმატებულ ასპარეზობას განაგრძობს.

გორგოძემ ერთეულთა თანრიგში მეოთხედფინალურ ეტაპზე ჩინელი ოპუ 2 სეტში დამაჯერებლად 6:1, 6:3 დაამარცხა და ნახევარფინალში გავიდა.

ქართველის მეტოქე ტურნირის მეხუთე ნომრად განთესილი ფრანგი დაიან პარი იქნება.

გორგოძე მონტევიდეოში წარმატებულად ასპარეზობს წყვილთა თანრიგშიც, სადაც რუმინელ ირინა ბარასთან ერთად ნახევარფინალში არგენტინულ-ბრაზილიური დუეტი ორ სეტში 6:2, 7:5 დაამარცხა და ფინალში ითამაშებენ.

შეგახსენებთ, რომ ბოლო დროს ეკატერინე გორგოძე წარმატებით ასპარეზობს. რუმინეთში ქალთა წყვილთა თანრიგში Transylvania Open-ზე ქართველმა ჩოგბურთელმა რუმინელ ბარასთან ერთად გამარჯვებას მიაღწია. ტურნირის საპრიზო ფონდი 235 238 დოლარი იყო.

ერთი თვის შემდეგ, ბუენოს-აირესში საერთაშორისო ტურნირის ფინალში ეკო გორგოძე და მისი მეწყვილე ირინა მარია ბარა არგენტინულ-ბერძნულ წყვილს დაუპირისპირდნენ და მძიმე ბრძოლაში სამ სეტში 5:7 7:5 10:4 გაიმარჯვეს. ეკო და ბარა მორიგ ტიტულს დაეუფლნენ. აღსანიშნავია, რომ წყვილმა ზედიზედ 11 შეხვედრა მოიგო.