მსგავსი ანგარიშით - ფუტსალის ნაკრებმა ნიდერლანდებთან მეორე სპარინგი გამართა
საქართველოს ფუტსალის ეროვნულმა ნაკრებმა ნიდერლანდებთან მეორე ამხანაგური მატჩი გამართა. პირველი შეხვედრის მსგავსად, მეორე თამაშიც ფრედ, 1:1 დასრულდა. მასპინძელი მხარის გადაწყვეტილებით, დღევანდელი მატჩი დახურულ კარს მიღმა გაიმართა, რის გამოც გოლების ეპიზოდების ხილვა ვერ ხერხდება.
ავთანდილ ასათიანის გუნდი მეორე ტაიმის დასაწყისში გიორგი ქურდაძემ დააწინაურა. მასპინძლებმა წონასწორობა რამდენიმე წუთში აღადგინეს - გოლი ფაისალ მელაჰმა გაიტანა.
შეგახსენებთ, რომ საქართველოს ფუტსალის ნაკრები ნიდერლანდებს ამხანაგურ შეხვედრაში გუშინაც დაუპირისპირდა და მატჩი ფრედ, 1:1 დასრულდა. ცნობისთვის, ავთანდილ ასათიანის გუნდმა ორივე შეხვედრაში ლიდერთა უმრავლესობის გარეშე ითამაშა.
საქართველოს ფუტსალის ეროვნული ნაკრები მომდევნო ოფიციალურ მატჩებს მსოფლიო ჩემპიონატის საკვალიფიკაციო ეტაპის ფარგლებში გამართავს. მეტოქეთა ვინაობა და მატჩების კალენდარი 6 ივლისს დაგეგმილ წილისყრაზე გახდება ცნობილი.