სანქციები რუსეთსა და ბელარუსს - ფიბამ გადაწყვეტილება მიიღო
კალათბურთის საერთაშორისო ფედერაციამ რუსეთისა და ბელარუსის ნაკრებები თავისი ეგიდით გასამართი ტურნირებიდან მოკვეთა. ფიბამ ოფიციალური განცხადება გაავრცელა და გვაუწყა, რომ უკრაინაში მიმდინარე მოვლენების გამო, რუსეთსა და ბელარუსს სანქციები დაუწესა.
ფიბას აღმასრულებელი კომიტეტის მიხედვით, უახლოეს პერიოდში რუსეთსა და ბელარუსში ფიბას ეგიდით გასამართი ტურნირები არ უნდა ჩატარდეს და რუსეთისა და ბელარუსის ნაკრებები მომდევნო საერთაშორისო ტურნირებიდან მოიკვეთონ. საუბარია 2023 წლის მსოფლიო ჩემპიონატის საკვალიფიკაციო ეტაპზე, 2022 წლის ქალთა მსოფლიო ჩემპიონატზე და 2022 წლის 17-წლამდე ნაკრებების მსოფლიო ჩემპიონატზე.
FIBA decisions on Russia and Belarus for upcoming competitionshttps://t.co/VLMBldGxyU
— FIBA Media (@FIBA_media) May 18, 2022
შეგახსენებთ, რომ რუსეთის ნაკრები ევრობასკეტზე საქართველოს ჯგუფში იმყოფება და თბილისში უნდა ჩამოვიდეს. კალათბურთის საერთაშორისო ფედერაციის განცხადებაში ამაზე არაფერია ნათქვამი და საკალათბურთო სამყარო მოვლენების განვითარებას ელოდება. გავრცელებული ინფორმაციით, ამ საკითხზე ფიბას ევროპული ზონის მმართველი საბჭო იმსჯელებს და ვერდიქტი მალე გახდება ცნობილი.