„მამარდაშვილის ტრანსფერი დიდი წარმატება იყო“ - ვალენსიას ლეგიონერების შეფასება

Valencianoticias-მა „ღამურების“ ლეგიონერების მიერ გასულ სეზონში ნაჩვენები ასპარეზობა შეაფასა. ესპანურმა გამოცემამ გიორგი მამარდაშვილზე განსაკუთრებული ყურადღება გაამახვილა და განაცხადა, რომ მისი ტრანსფერი „ჩეს“ ხელმძღვანელთა ერთ-ერთი ყველაზე წარმატებული ნაბიჯი იყო.

„197 სანტიმეტრი სიმაღლის მქონე ქართველმა მეკარემ ვალენსიას კარის დაცვის პასუხისმგებლობა აიღო და ღამურების მაისურით 21 შეხვედრა ჩაატარა. საერთო ჯამში, მან 21 გოლი გაუშვა და საშუალოდ მატჩში მიღებული ბურთების მხრივ, სილესენზე ბევრად უკეთესი შედეგი აქვს.

მისმა ასაკმა და სეზონის პირველ ნაწილში ნაჩვენებმა თამაშმა კლუბს მოტივაცია მისცა, რომ მისი კონტრაქტის დაცვა გადაეწყვიტა. მამარდაშვილის გაფორმება ვალენსიას ხელმძღვანელთათვის დიდი წარმატება იყო და იგი უცნობი ფეხბურთელიდან გუნდის საკვანძო მოთამაშედ იქცა“, - წერს ესპანური გამოცემა.

ცნობისთვის, გასულ სეზონში, ლა ლიგისა და სამეფო თასის ჩათვლით, მამარდაშვილმა 21 მატჩი ჩაატარა და გოლი 9 თამაშში არ გაუშვა. რაც შეეხება კონკრეტულად ლა ლიგას, ბორდალასმა სასტარტოში 18 შეხვედრაში დააყენა და გიორგიმ კარი მშრალად 8 მატჩში შეინახა.