„ზეიმი ნაადრევია“ - კაშიას კომენტარი ფერენცვაროშთან გამარჯვების შემდეგ

გუშინ, ჩემპიონთა ლიგის ჯგუფური ეტაპის მეორე საკვალკიფიკაციო რაუნდში ქართველების „სლოვანი“ უნგრულ „ფერენცვაროშს“ ესტუმრა და დრამატულ მატჩში მინიმალური სხვაობით, 1:2 დაამარცხა.

საგულისხმოა, რომ 81-ე წუთამდე ბრატისლავური გუნდი 1:0 მარცხდებოდა, თუმცა გამარჯვების მოპოვება მაინც შეძლო. სასიხარულოა, რომ „სლოვანის“ ორივე გოლში ლომის წვლილი ქართველებმა დაიდეს. სტუმრებმა ანგარიში სტანდარტული მდგომარეობიდან გათამაშების შემდეგ გურამ კაშიას გოლი აღადგინეს, 87-ე წუთზე კი გიორგი ჩაკვეტაძემ მოედნის ცენტრიდან ბრწყინვალე სოლორეიდი შემოგვთავაზა და საბოლოოდ ბარსეღიანს გამარჯვების გოლი გაატანინა.

შეხვედრის დასრულების შემდეგ გამართულ პრესკონფერენციაზე საქართველოს ნაკრებისა და ბრატისლავას „სლოვანის“ მცველმა, გურამ კაშიამ ჟურნალისტებთან მცირე კომენტარი გააკეთა და განვლილი მატჩი შეაფასა.

„ჩვენთვის კარგი დღე იყო, მაგრამ საქმე ბოლომდე ჯერ არ მიგვიყვანია. წინ კიდევ ერთი 90 წუთი გვაქვს და ნაადრევად ზეიმი არ გვინდა. ამ უქმეებზე ჩემპიონატის მატჩი გველის და შემდეგ ფერენცვაროშთან განმეორებითი მატჩისთვის კარგად უნდა მოვემზადოთ“, - განაცხადა კაშიამ.

შეგახსენებთ, რომ „სლოვანში“ სამი ქართველი ფეხბურთელი - გურამ კაშია, ჯაბა კანკავა და გიორგი ჩაკვეტაძე თამაშობენ, მთავარი მწვრთნელი კი ვლადიმირ ვაისია, რომელიც საქართველოს ნაკრებს 5 წლის განმავლობაში ხელმძღვანელობდა.

„სლოვანსა“ და „ფერენცვაროშს“ შორის საპასუხო დაპირისპირება 27 ივლისს გაიმართება.