ცრვენა ზვეზდას დირექტორი: რუსულ კლუბებთან სათამაშოდ ყოველთვის მზად ვართ, ჩვენ ძმები ვართ
იმის მიუხედავად, რომ რუსეთის ჩემპიონატის კლუბები და ყველა ასაკობრივი ნაკრები საერთაშორისო ტურნირებიდან რამდენიმე წლით არიან მოკვეთილები, საფეხბურთო კლუბ ცრვენა ზვეზდას გენერალური დირექტორი, ზვეზდან ტერზიჩი ამბობს, რომ სერბული კლუბი რუსულ გუნდებთან თამაშისთვის ნებისმიერ დროს მზად არის.
რა თქვა ტერზიჩმა:
ყოველთვის და ნებისმიერ დროს მზად ვართ რუსულ გუნდებთან სათამაშოდ, ჩვენ ძმები ვართ!
„ზენიტთან“ თანამშრომლობის მემორანდუმი გავაფორმეთ და თამაშისთვისაც მზად ვართ. ბოლო მატჩი ცოტა ხნის წინ იყო და ყველაფერმა მშვენივრად ჩაიარა. შესაძლოა, ნოემბერში, ყატარის მსოფლიო ჩემპიონატზე „ზენიტთან“ ერთად ვითამაშოთ.
ცნობისთვის, სერბულმა კლუბმა „ზენიტთან“ ცოტა ხნის წინ სოჭში ამხანაგური შეხვედრა გამართა, რომელიც რუსული კლუბის გამარჯვებით, 2:1 დასრულდა.
შეგახსენებთ, რომ რამდენიმე დღის წინ „ცრვენა ზვეზდას“ საქართველოს ნაკრების ფეხბურთელი, ირაკლი აზაროვი შეუერთდა, ბათუმის „დინამომ“ კი მის სანაცვლოდ 300 ათასი ევრო მიიღო.
სერბული გუნდი შიდა ჩემპიონატის გარდა უეფას ჩემპიონთა ლიგის შესარჩევ ეტაპზეც ასპარეზობს. ირაკლი აზაროვის გუნდი ფლეი ოფში „მაკაბი ჰაიფას“ შეხვდება.
