ეს პრობლემაა - ანჩელოტი თვლის, რომ რეალი კაზემიროს მოკლე დროში ვერ შეცვლის

კარლო ანჩელოტი კაზემიროს შესაძლო წასვლით იმედგაცრუებულია და თვლის, რომ ეს გუნდისთვის დიდი პრობლემა იქნება.

Marca-ს ცნობით, „პაპა კარლოს“ კაზემიროს დარჩენა სურს, თუმცა თუ კლუბი ფეხბურთელს გაყიდის, იტალიელი ამის გამო კონფლიქტს არ შექმნის.

ესპანელი ჟურნალისტი ედუ აგირე წერს, რომ ანჩელოტი კაზემიროს მოკლე ვადაში შეუცვლელ ფიგურად თვლის. მიუხედავად იმისა, რომ „რეალმა“ აურელინ ჩუამენი იყიდა, ასევე გუნდში ედუარდო კამავინგაც არის, მწვრთნელის აზრით, ამ სეზონში კაზემიროს ჩანაცვლება დიდი პრობლემა იქნება.

როგორც მოგეხსენებათ, დღეს გავრცელდა ინფორმაცია, რომ კაზემირო და „მანჩესტერ იუნაიტედი“ პირადი კონტრაქტის პირობებზე შეთანხმდნენ.

მოსალოდნელია, რომ „იუნაიტედი“ 60 მილიონ ევროს გადაიხდის, მადრიდელები კიდევ 10 მილიონ ევროს ბონუსების სახით მიიღებენ.

კაზემიროსთან კონტრაქტი 4 წლით გაფორმდება და კიდევ ერთი სეზონით გახანგრძლივების ოფცია იქნება გათვალისწინებული.

რეალი კაზემიროს შემცვლელს ვერ ყიდულობს

დღეს ბრიტანულმა გამოცემებმა დაწერეს, რომ „რეალი“ ნიუკასლიდან“ ბრუნო გიმარაეშის გადაბირებას გეგმავდა და მას კაზემიროს შემცვლელად მიიჩნევდა.

თუმცა, ცოტა ხნის წინ ცნობილი გახდა, რომ ამ ზაფხულს მადრიდელები გიმარაეშს ვერ შეიძენენ.

„ნიუკასლმა“ გიმარაეში იანვარში „ლიონიდან“ 50 მილიონ ევროდ შეიძინა და ფეხბურთელთან ასე მალე განშორებას არ გეგმავს.