„თურქებს ნიშნისმომგები მესიჯები სათითაოდ გავუგზავნე“ - აჩი დავითაშვილის ტრანსფერზე
ვეტერანი ფეხბურთელი, აჩი არველაძე CrystalSport-ის Youtube არხის კონტენტ "საგოლე გადაცემა"-ს სტუმარი იყო და სხვადასხვა საინტერესო თემების შესახებ ისაუბრა. ერთ-ერთი საკითხი ზურიკო დავითაშვილის "ბორდოში" ტრანსფერს შეეხო.
არველაძის თქმით, ზურიკოს დამატებით რამდენიმე თურქული გუნდიც ინტერესდებოდა და მას ამ თემაზე პირადი კომუნიკაციაც ჰქონდა.
მინდა, აღვნიშნო, რომ ზურიკო ძალიან კარგ კლუბში წავიდა. რამდენიმე თურქული გუნდი კონსულტაციისთვის დამიკავშირდა და მინდოდა, კარიერა იქ გაეგრძელებინა, მაგრამ საქმის ბოლომდე მიმყვანი არც ერთი აღმოჩნდა. საბოლოოდ, ძალიან გამიხარდა, რომ ბორდოში გადავიდა და თურქებს ნიშნისმომგები მესიჯები სათითაოდ გავუგზავნე.
საერთოდ, მისთვის ბათუმური მოკლე პერიოდი ძალიან სასარგებლო გამოვიდა, განსაკუთრებით ევროტურნირების მატჩები. ის ატმოსფერო და საფეხბურთო ციებ-ცხელება, რაც ბათუმში იყო, ადვილად სატარებელი ტვირთი არაა, მან ამას გაუძლო და კარგ გამოცდილებად შეიძინა. 20 000 კაცის წინაშე თამაში და ამ წნეხის ფონზე ისე თამაში, როგორც მან ითამაშა, პატარა ამბავი არ არის. ამ შესანიშნავი გარემოდან მშვენიერ ევროპულ კლუბში აღმოჩნდა და იმედი მაქვს, მისი ფრანგული კარიერა წარმატებული იქნება.
შეგახსენებთ, რომ CrystalSport-ის Youtube არხზე "საგოლე გადაცემა" ყოველ ორშაბათს 20:00 საათზე LIVE რეჟიმში გადის. აჩი არველაძის სტუმრობა შეგიძლიათ, აბზაცის ქვემოთ მოცემულ ბმულზე იხილოთ.
