კრისტალბეთ ეროვნული ლიგა: დინამომ 2 ქულა დაკარგა, სხვაობა შემცირდა
„კრისტალბეთ ეროვნული ლიგის“ 35-ე ტურში მნიშვნელოვანი მატჩები გაიმართა. საჩემპიონო ბრძოლა ნელ-ნელა კულმინაციას აღწევს.
ყველაფერს ბოლო ტური გადაწყვეტს, რადგან თბილისის „დინამომ“ წყალტუბოში „სამგურალთან“ ქულები დაკარგა. გია ჭიაბრიშვილის გუნდმა ფრედ 1:1 ითამაშა.
21-ე წუთზე მასპინძლები გიორგი ნიქაბაძემ დააწინაურა. 56-ე წუთისთვის „დინამომ“ წონასწორობის აღდგენა მოახერხა. გოლი ომარ იმრანმა გაიტანა.
თბილისელებს წინ გასვლაც შეეძლოთ, თუმცა მომენტები ვერ გამოიყენეს და 2 ძალიან მნიშვნელოვანი ქულა დაკარგეს.
რაც შეეხება გია გეგუჩაძის გუნდს, ბათუმის „დინამომ“ „გაგრას“ სტუმრად 4:1 მოუგო. შეხვედრაში საუკეთესო ჯაბა ჯიღაური იყო, რომელმაც დუბლი გაიფორმა. თითოჯერ კი თავი ჯოვინომ და ვაწაძემ გამოიჩინეს.
ბოლო 36-ე ტურის წინ სატურნირო ცხრილში ასეთი ვითარებაა: 77 ქულით თბილისის „დინამო“ ლიდერობს, ბათუმს კი 76 ქულა აქვს. 3 დეკემბერს ჭიაბრიშვილის გუნდი „გაგრას“ უმასპინძლებს, გეგუჩაძის ბიჭები კი „ტორპედოს“ დაუხვდებიან.
თბილისელებისთვის ყველაფერი მარტივად არის - საკუთარ მოედანზე უნდა მოიგონ და ჩემპიონები არიან.
ტურის სხვა მატჩები ასე დასრულდა:
ტორპედო 3:0 სიონი
თელავი 1:1 დილა
ლოკომოტივი 0:1 საბურთალო