ჯერ საჩუქრებს დაჰპირდნენ, შემდეგ დაემუქრნენ - უდიდესი წნეხი ირანის ნაკრებზე

მსოფლიო ჩემპიონატის ჯგუფური ეტაპის პირველ შეხვედრაში, ირანის ნაკრები ინგლისს დაუპირისპირდა. მატჩის დაწყებამდე, ირანელებმა ჰიმნი არ შეასრულეს, რის გამოც, სერიოზული პრობლემები შეექმნათ. ამ საკითხზე CNN-ი დეტალურად საუბრობს და „სამ ლომთან“ წაგების შემდეგ განვითარებულ მოვლენებზე წერს.

როგორც ირკვევა, მატჩის შემდეგ, ირანის ეროვნული გუნდის ფეხბურთელები ისლამური სახელმწიფოს გუშაგთა კორპუსის ოფიცრებთან შეხვედრაზე დაიბარეს. მათ განუცხადეს, რომ თუ უელსთან მატჩამდე ჰიმნს არ შეასრულებდნენ ან ირანის მოქმედი მთავრობის წინააღმდეგ წამოწყებულ რაიმე სახის პოლიტიკურ აქციას შეუერთდებოდნენ, მათ ოჯახებს „სასტიკად და წამებით“ გაუსწორდებოდნენ.

CNN-ის ცნობით, ინგლისთან მატჩამდე, ფეხბურთელებს საჩუქრებსა და მანქანებს დაჰპირდნენ, რათა მათ ირანის მთავრობის საწინააღმდეგო პოზიცია არ დაეფიქსირებინათ. თუმცა, მას შემდეგ, რაც მათ ჰიმნის შესრულებაზე უარი თქვეს, ქვეყნის მმართველები მუქარაზე გადავიდნენ.

შეგახსენებთ, რომ იმავე CNN-ის მიხედვით, ირანის ნაკრების მოთამაშეები ისლამური რევოლუციის გუშაგთა კორპუსის ოფიცრების ზედამხედველობის ქვეშ არიან. მათ ეროვნული გუნდის რიგების დატოვება და უცხოელებთან შეხვედრა აკრძალული აქვთ.