მე-19 ჩემპიონობა - თბილისის დინამო კრისტალბეთ ეროვნული ლიგის გამარჯვებულია
„კრისტალბეთ ეროვნული ლიგის“ დასკვნით 36-ე ტურში თბილისის „დინამომ“ „გაგრას“ უმასპინძლა და საჩემპიონო მატჩში 2:1 გაიმარჯვა.
„დინამო არენაზე“ გამართულ შეხვედრაში ანგარიში პირველ ტაიმში გაიხსნა. 39-ე წუთზე გუნდის ლიდერმა დავით სხირტლაძემ შორეული დარტყმით ლამაზი გოლი გაიტანა.
მეორე ტაიმში „დინამომ“ უპირატესობა ომარ იმრანის ულამაზესი გოლით განიმტკიცა. მაროკოელმა შემტევმა შორეული გასროლით ბურთი პირდაპირ ცხრიანში გაახვია - 2:0.
„გაგრამ“ ანგარიშში სხვაობა 73-ე წუთზე შეამცირა. გოლის ავტორი თამაზ მაქაცარია გახდა.
ამრიგად, გია ჭიაბრიშვილის გუნდმა 9-ქულიანი ჩამორჩენა აღმოფხვრა და ისტორიაში ჩემპიონის მე-19 ტიტული გაიფორმა.
რაც შეეხება თბილისელთა მთავარ კონკურენტს ბათუმის „დინამოს“, გეგუჩაძის გუნდმა ბოლო ტურში საკუთარ მოედანზე ქუთაისის „ტორპედოსთან“ ფრედ 2:2 ითამაშა და ჩემპიონს 3 ქულით ჩამორჩა.