ბრაზილია, სამხრეთ კორეა
Aa
Aa

ვინისიუსის და სილვას მიღწევა - ბრაზილია მეოთხედფინალშია

მსოფლიო ჩემპიონატის მერვედფინალში გულშემატკივრებს ბრწყინვალე დაპირისპირება იხილეს. ბრაზილია სამხრეთ კორეას შეხვდა და 4:1გაანადგურა აღსანიშნავია, რომ „სელესაომ“ ყველა გოლი პირველ ნახევარში გაიტანა.

პირველი ტაიმი კი ალბათ მიმდინარე მუნდიალზე საუკეთესო ტაიმი იყო. ანგარიში მე-7 წუთზე ვინისიუს ჟუნიორმა გახსნა, რასაც 5 წუთში ნეიმარმა უპასუხა. „პარი სენ ჟერმენის“ ვარსკვლავმა პენალტის ნიშნულიდან გაიტანა.

„სელესაო“ ამაზე არ გაჩერდა. 29-ე წუთზე რიშარლისონმა გაისროლა და 3:0 დააფიქსირა. ტაიმში უკანასკნელი გოლი კი პაკეტას ანგარიშზეა, რომელმაც ვინისიუსის კარგი პასი გამოიყენა.

მეორე ნახევარში, „სელესაო“ ისეთი აქტიური აღარ იყო და მოწინააღმდეგეს მომენტების შექმნის შესაძლებლობა მიეცათ. რა თქმა უნდა, ტიტეს შეგირდებსაც ჰქონდათ მომენტი, მაგრამ გოლი სამხრეთ კორეამ გაიტანა. 76-ე წუთზე თავი სიუნ-ჰო პაიკმა გამოიჩინა. დარჩენილ დროში ანგარიში აღარ შეცვლილა და ბრაზილია მეოთხედფინალში გავიდა, სადაცა ხორვატიას დაუპირისპირდება.

ასევე, აღნიშნულ მატჩში ორი საინტერესო ფაქტი დაფიქსირდა. ვინისიუს ჟუნიორი 2002 წლის შემდეგ, ყველაზე ახალგაზრდა ბრაზილიელია, რომელმაც მუნდიალის პლეი-ოფში გოლი გაიტანა. აქამდე ეს შედეგი რონალდინიოს ეკუთვნოდა.

1966 წლის შემდეგ, ტიაგო სილვა გახდა ყველაზე ასაკოვანი ფეხბურთელი, რომელმაც მსოფლიო ჩემპიონატზე საგოლე გადაცემა შეასრულა. ვეტერანმა ბრაზილიელმა ეს 38 წლის და 74 დღის ასაკში მოახერხა. „ჩელსის“ მცველმა როჯერ მილას შედეგი გააუმჯობესა, რომელიც 1990 წლის მუნდიალზე 38 წლის და 42 დღის იყო.

მსგავსი სიახლეები

ცხელი ამბები
ასევე დაგაინტერესებთ
ფერდინანდი: “ინგლისის ბირთვი საფრანგეთისას ჯობს“
ფერდინანდი: “ინგლისის ბირთვი საფრანგეთისას ჯობს“